後期的狀況
自問覺得自己佗B起來,手腳還很靈活算輕鬆,但到後期行走半小時雙腳便發軟,能夠想像到其他佗巨B的媽媽走起路上來有幾辛苦。向來人生好少抽筯的我最終整個孕期都經歷過兩次,不過感恩只係痛左半分鐘左右
就處理好,平日多飲水、每日散步、瞓覺時墊高小腿瞓都有幫助啊~間唔中要捉埋老公一齊散步散心呢~
特別的產前經歷
第28週的有一天,梳洗後發現有少量見紅,因為無其他唔舒服,諗住再觀察下先,但諗諗下都係比醫生檢查下安全啲。懷著平常心食埋個lunch去到醫院(24週後胎兒有任何狀況的話可以直接去自己掛號既醫院),姑娘聽
到我描述既情況,話呢個週數有呢個徵狀不正常,需要留一晚院觀察喎! 係咩都無預備既情況下登記入院,做左一連串檢查,內疹、量血壓、量胎心跳…同時要麻煩老公返去幫我執啲梳洗物資,買埋飯等夜晚探病時間再
拎比我。觀察左一晚,第二日照埋超聲波,一切正常都搵唔到咩原因,中午便安排出院。雖然無端端住左晚院,但就當賺左個免費超聲波檢查,同住產前病房既體驗啦,大部份姑娘都好nice丫。
免費流感針
踏入冬季加上流感高峰期,不小心染上傷風咳,晚晚都瞓得唔好,兩星期久久未好,一方面擔心會否一直惡化,另一方面又怕會影響到BB健康,BB第時記得好清晰既未必係我同佢講野把聲,而係咳既聲…加上接近足月,心諗本身生B都辛苦,如果病住黎生會係惡夢x10…後來再睇醫生,本身無乜期待,因為可以開比孕婦既藥種唔多,醫生都強調只能起舒緩作用呢~ 感恩睇左一次經已好番好多喇,仲因為孕婦關係合資格打埋免費流感針添!
我的恩典夠你用的。因為我的能力、是在人的軟弱上顯得完全。所以我更喜歡誇自己的軟弱、好叫基督的能力覆庇我。林後 12:9
搬家
過去四年多與奶奶同住的經驗,身心靈都再受不了,加上從BB既角度去衡量,衛生環境空間等都非常唔適合,無論如何都需要搬離,最終同家人商量後,選擇搬返娘家住。對我黎講其實心情非常忐忑,一來會打擾屋企人原有生活,二來要面對自己心理情緒上既一些擔憂同恐懼,但我地無足夠經濟能力可以搬出去,為左BB我只能硬著頭皮去面對,亦提自己要仰望神既幫助,單單仰望神!
距離預產期一個半月,開始螞蟻搬家咁將各樣物資搬返娘家,係搬番黎娘家前後既日子,好感激媽咪勞心勞力幫手預備各樣,拆床換床打掃愛心湯水一腳踢,多謝上帝比我一個女強媽,一直係我由細到大既榜樣!
發現我有B鏈
第37週如常產檢,這次要做乙型鏈球菌拭子篩查,點知一個星期後收到電話話我有B鏈球菌,向來檢查都一切正常,真心無諗過自己會中。返去即刻再研究番相關資料,感恩香港醫療配套都經已好好,只要生之前打夠兩支抗生素便可大大降低BB感染既風險喇。
由懷孕到產後,大致上既流程在網上同一般資訊都可以預知得到,但到真正經歷每一步時卻每個媽媽都有差異,發生在其他人身上的唔等於一定會出現在你身上,都是獨一無二的體驗,可以用心細味觀察神工作的痕跡。就如雖然在無預期下得了乙型鏈球菌,要生產時捱多兩針,諗番如果我在生產後才得知有呢個菌,係無藥物保護幫助下,BB可能會得嚴重併發症呢~早預知了反而多了一重保險,所以說 ,凡事謝恩,總有恩典,依靠衪走的路一點也不可怕呢!
我的心哪、你當默默無聲、專等候神,因為我的盼望是從他而來。詩 62:5
環境不應是我們的目光所在,每一次只有向神呼求,心才能得安穩,神在懷孕過程的祝福提醒我要全然相信衪的工作!
驚嘆生命奇妙
一邊觀察著身體的變化,會驚嘆一切自然配合得奇妙,媽媽既身體同寶寶會隨住時間會知道自己幾時要有咩變化,媽媽荷爾蒙增加、子宮擴大、盆骨鬆開、乳汁分泌…BB四肢骨骼慢慢長成、練習呼吸、排尿、胎頭向下轉…等,好體會到生命一切掌握在神的手裡,因為連我地作為身體既主人都無法了解控制得到~
仰望恩典去迎接寶寶
距離預產期兩個星期左右,2020年的香港,非典型肺炎(COVID19)開始急速擴散,這陣子身邊都有認識既人經已生B,心情開始緊張同時又擔心疫情會有所影響。BB應該早啲定係遲啲出世比較安全呢?其實都無得揀,選擇左自然分娩,就等BB自己決定佢既出生日期~ 有一晚,收到一個壞新聞,聯合醫院接收了發燒嬰兒的懷疑個案,我的心崩潰了,急得眼淚一直流…老公安撫了一下,祈禱後才能入睡。第二天都收到有姊妹問候比左啲意見,上網搵定私院相關資料做backup plan後,心才定了下來。成為準媽媽後,時時刻刻都為BB的事上心,情緒真係會比平日波動,不過這正正就係母愛既表現呢~
37週之後,隨時都要ready BB會出世,等候期間緊張又期待,走佬袋執好、BB床砌好、衫仔洗好曬、奶樽消毒了,一切預備好。另一方面加上肺炎疫情嚴峻怕唔夠口罩用,減少出門在家休息,等等下…都真係悶到發霉…
我的心哪、你當默默無聲、專等候神,因為我的盼望是從他而來。詩 62:5
環境不應是我們的目光所在,每一次只有向神呼求,心才能得安穩,神在懷孕過程的祝福提醒我要全然相信衪的工作!
