活動能力增加
七月首星期半拖半爬，越爬越快，亦識得由爬姿勢退後變做坐，爬爬下又會扶住野借力企起身。抱著時不斷在轉動身體，加上雨恩重左，要好好捉實免得從手中滑下來。婆婆見佢高左成日想企，放佢係學行車自己自由行，開頭試行到幾步，一星期後就執開啲野比佢係廳周圍走喇，雨恩都好似好享受咁。
七月第三星期，爬既姿勢進步左，會左手右腳咁爬了。
同枱食飯
每晚食飯雨恩都一個胃食樣望住我地等食，見佢開始識坐，便引入了BB椅一齊同枱食飯，將豆腐、魚、菜…等用匙稍為壓碎雨恩都可以咀嚼得到都算方便。由於懶同埋覺得粥仔營養無米糊或直接食蔬菜咁多，一直未整。開始要諗煮啲咩比雨恩食，又會諗會唔會買部機返黎方便啲呢？上網爬文發現好多媽媽話坊間既蒸煮攪拌機實際使用期短，慶幸無買！做功課真好緊要，否則又浪費了金錢。
乳牛稍稍緩戰
為左免得啲冰奶過期，而家日氹三次奶，中午幸運的話我可有小休時間，以淺睡待機狀態，跟雨恩一起午睡。早兩個月本來仲掙扎緊係咪放棄餵人奶，不知不覺又捱多左兩個月了。我的戰鬥力從何而來？
耶和華是我的力量，我的詩歌，也成了我的拯救。這是我的神，我要讚美他，是我父親的神，我要尊崇他。出 15:2
半夜牙痕不斷
呢期雨恩瞓得唔好，半夜因為牙痕唔舒服札醒喊，要老豆抱住氹番佢瞓，令我地都瞓得唔好，為左解決呢個問題，日間盡量比佢郁多啲爬多啲消耗足夠精力，的確晚上會瞓得好啲，放係床仔自己玩玩下仲會瞓著左，每天都這樣完美結束就好喇~
淚線未通
之前因為雨恩眼睛一直好多眼屎比婆婆日日”娥”之下睇醫生，醫生話BB淚線未通，一般過幾個月會有改善，結果同我認知既一樣，呢次求醫純碎係為左安慰婆婆既心。之後雨恩七個半月時婆婆買左啲七星茶，雨恩飲左兩日，問題解決了~但唔知係因為隨住雨恩成長淚線開始通番定真係因為啲七星茶呢？
你估我唔到
有晚食完飯，老公飲住紙包飲品睇電視，雨恩好奇咁望住包野飲，為左滿足佢既慾望，諗住放飲管係嘴邊比佢咬下，點知佢自己識得啜黎飲，我地眾人都大為驚嚇，”你幾時學識用飲管家？”佢咁叻，唯有獎佢飲兩啖~之後即刻開個學習杯比佢用，雨恩Level Up又多樣新裝備喇！
BB技能解鎖：
- 自己由爬轉換做坐
- 拉著東西可借力站起來
- 雙膝爬行
- 用學習杯飲水
- 固體食物加入更多種類
