長征探親
首次長征去見公公,我地既心情都戰戰兢兢,特意加添了些裝備,爸爸那邊都費盡心力安排一切。執好一大袋物資起程,結果由到步到走期間雨恩都不斷喊,喊攰左就瞓,瞓醒又喊…不過見到爸爸望住雨恩個樣咁甜,咁遠帶佢黎都值得。公公:BB妳咁快就咁大個喇,媽媽花左幾多心機照顧你啊? 我即搶答:花左全副心機!夜晚在三號波懸掛,風雨中離開,嗰日其實下午我經已開始頭痛,耐無出街忘記帶藥,頭痛慢慢增加,搭的士回家路上都驚會嘔,最後頂到尾,忍到返屋企先嘔…食粒藥之後又忙住幫雨恩沖涼,梳洗完再泵埋奶才休息,當晚大家都瞓得好好。原來帶雨恩出街大半日係咁攰。
脫髮麼?
遠征完公公家,收到大家影既相,望落啲相自己個樣怪怪的,才發現自己頭頂頭髮少了,噢!這就是傳說中既產後脫髮問題,不過只是少部份受影響,問題不大沒有理會。
轉身再轉身
踏入四個月幾天,雨恩開始手搭在膝頭上,甚至舉腳玩腳指。四個月一星期放係床上玩玩下腳指就自己側身瞓再轉身喇!每次見到佢做新動作都好令人興奮!四個月第二周,雨恩可以流暢地自己翻身,興奮起上黎,仲會不斷轉身再轉身添~呢段期間奶量減少,雨恩又飲多左,要加番一兩次泵黎追奶…
照顧雨恩既過程,每每回想感歎原來爸媽當年湊我係咁辛苦!佢地所擺上既犠牲只有自己都當父母才真正明白。
試新野
四個月第三周,初嚐腳指之味!減少用手襪仔,開始識得抓住東西玩,比多啲唔同質感形狀既東西佢玩,刺激觸感應知。
BB技能解鎖:
- 兩隻腳板合起來互相玩弄
- 扭要食新食物
- 拿起東西放入口
- 間或掛住玩唔飲奶
- 飲奶間距回復到3小時一次,平均飲5安
- 開始餵水果比雨恩啜,而且會認得水果顏色
- 視野達兩米
- 會撟腳
- 開始自行翻身
- 識用咬咬樂食橙
- 仰臥時食腳指
黑夜睡覺,白日起來,這種就發芽漸長,那人卻不曉得如何這樣。地生五穀是出於自然的:先發苗,後長穗,再後穗上結成飽滿的子粒。可 4:27-28
“成長”似是自然的事,但其實一啲都唔簡單!
父親節
正值父親節,帶雨恩去同親戚食晚飯,一上的士就爆喊,司機嚇親以為自己揸得太快定係冷氣較得太大,其實只係雨恩唔慣去陌生環境啫。感謝神細心預備,我地坐嗰張枱係死角位,可以離人群遠啲同減少BB喊聲為其他食客帶來既滋擾。成餐飯雨恩面對咁多陌生人顯得好不安,不停扭計,匆匆食完就趕住走。但雨恩既出現令表哥表姐仔們好有興趣,亦都因為大嫂坐我隔離,我地展開認識以來第二次對話(ps. 對上一次係婚禮採排日) 佢向來安靜,藉著雨恩打開了話題,仲成晚主動幫我倒茶、照顧我,關係上一個非常好的開始~過左呢日才醒起無問到老公,第一次過父親節有咩感受呢?
孤單感
疫情下,全城減少出門,一個月我只會向家申請外出一兩次,其餘時間都困係屋企,家人上班後就得番我同雨恩。久久無出街,想出去抖下氣,有時即使搵家人幫手睇住雨恩,因為要泵奶限制出門時間只有兩三小時,耐唔泵奶胸部會好痛,無奈係泵奶只有我自己可以做,無得假手於人,要趕來趕去,出街過程一點也不暢快、唔開心,試過買完野返黎,老公第一句就說”呢啲野我幫你買咪得” 就令我火起”我唔係廢人,同埋我想出去抖下氣得唔得?” 身邊有家人一齊都好,心裡面有時都會覺得好孤單,使我更加明白任何人都不可靠,只有神才可信賴!
我的心哪,你為何憂悶?為何在我裡面煩躁?應當仰望神,因他笑臉幫助我;我還要稱讚他。詩 42:5
