幾小時的呼吸

腰痛走！

自八個月打後，湊B感覺輕鬆了一點，唔洗無時無刻都抱住佢，雨恩識得爬會自己玩玩具，可以放鬆係側邊睇住。抱少左令我腰痛同手腕既痛都改善了，但整體四肢靈活度真的差太遠，簡單伸展同拉筋都有困難，我真的老了！

原來雨恩九個月嗰日正正係我同老公結婚周年，向媽咪請假幾個鐘幫手睇住雨恩，夜晚同老公拍拖去酒店食自助餐，本身諗住老公生日同埋屋企人一齊食，點知 full booking就順延日子到下個月，等我地兩人去完成未完既心事，以前從來都唔會揀食自助餐，但因為餵人奶關係，大食左好多。生左雨恩之後，今年只有大家既紀念日先有得兩個人靜靜拍拖，好珍惜呢幾個鐘既時間。

工程突襲

話說屋企既小型工程一直斷續分階段進行，有一天，整地台既師傅朝早打來話下午過黎做工程，得幾個鐘時間預備，突然要重新調動泵奶時間同執野安排帶雨恩外出。咁啱嗰朝奶奶無帶鎖匙所以老公返左佢娘家，正打算離開住所回公司就收到我呢個消息，就索性 wfh等我帶埋雨恩過去，咁嗰幾個鐘我就唔洗愁，係邊度搵地方去廁所，搵地方餵雨恩食奶食糊仔，另外帶雨恩去見下奶奶當交人，上帝將一切都預備得太好！

耶和華所賜的福使人富足，並不加上憂慮。箴 10:22

工程再續

過左一星期，裝門師傅早兩日打來說過黎裝門，今次就有時間預備，老公問准公司又安排到 wfh，今次連續要做六個鐘又不得不再返奶奶家一趟，又係一個恩典。如果唔係因為老公做呢間公司，生雨恩呢年就唔會咁有彈性可以 wfh，一次又一次咁解決湊B上既安排，諗番轉頭，即係話三年前老公入到呢間公司上帝經已有預備！上帝既道路真係遠高過我地凡人既道路！

戒奶的開端

九月半的一天，雨恩突然唔肯飲中段嗰餐奶，本身都嬲嬲地，咁辛苦泵啲奶出黎比佢唔飲，但佢婆婆回一句”噢，BB自己識戒奶仲好”提醒左我，雨恩又長大了，漸漸飲少啲奶才是正常吧。那刻心思竟然覺得矛盾，想雨恩快啲大個可以結束自己既母乳生涯，另一方面又會為雨恩將唔再需要自己既母乳而失落，終於明白之前朋友跟我分享感受了。

見雨恩出牙進程比較慢，好天時多左帶佢出去曬太陽，見到其他小朋友識行識跑自己玩，期待雨恩將來一齊玩，出街唔洗淨係坐BB車同困係揹帶裡。另一個外出我愛去的地方就是圖書館，隨住人生經歷既轉變，開發左自己睇書既類別，會睇懷孕相關的，而家走到育兒書櫃亦會雙眼發光，首選係基督教類別，之後會研究唔同國家既人育兒有咩可取之道，希望教導雨恩將來識得獨立思考和生活，不隨波逐流。