我的身體狀況
雨恩重左好多,將佢抱來抱去,我腰骨都痛得像要斷,媽媽手出現,腳屈坐久會痛,感覺自己真係老左好多,手腳都無咁靈活,體力大不如前, 又無時間做運動…我的體能會恢復嗎?
寶寶精力充沛
雨恩日間睡覺時間再減少,要陪玩時間又多左,天真的我每個月都幻想下個月湊雨恩無咁辛苦,但結果係不斷有新既轉變,都同時有新既需要出現。雨恩飲奶開始好分心,換片會轉身想走佬。但有進步既係,朝早瞓醒左唔會即刻大喊,會自己係度玩,玩到肚餓先喊食奶,或者坐住玩到咁上下就喊要企。
我識爬喇
學完轉身,就多左放佢係軟墊,維持左好多日都只係識停留係原地,六個月一星期多啲,終於爬出第一步去拎玩具,一度以為自己眼花,就將玩具再放遠啲,雨恩雙手前爬拖著下半身前進,拎住玩具玩玩下,又會成隻翻轉,呢個時候朋友送的甜蝦護頭枕出場,睇住隻蝦係度游,好療癒~爬左一陣就喊攰,每爬一步佢都要用盡全身既氣力,小寶寶妳好叻家喇~
育兒資訊話我聽,過多幾個月佢可能就識企識行,真的嗎?人仔細細真係做咁多野?過去咁多個月都習慣要手抱住佢出出入入,到時佢識行識走係咩感覺呢?六月三星期會抓住床邊企起來,亦爬得好快,要全程望實。有一晚係軟墊爬爬下爬左出黎地磚,一下子頭就撞到地下大喊了。即使我坐係側邊睇住佢,都黎唔切阻止悲劇發生,意外來得太快。以前我一直認為自己算係手腳靈活反應快嗰類人,但在雨恩面前,我徹底輸了!令我諗起有人分享過,工作上做到幾專業,有幾高成就都好,當成為新手媽媽,一切能力都歸零。哈~既然所有父母都由零開始,還算公平吧!
新工作
產後自己腰骨一直還在痛未回復,唔敢幫雨恩沖涼,怕會滑手捉唔住佢,而家雨恩半歲識坐,我就放心接手幫佢沖涼,時間容易控制啲,唔洗等老公返來夜夜先有得沖。
你牙痕,我地頭痕
牙痕關係,雨恩流好多口水,亦會半夜喊醒,我地既睡眠質素又因此變差了…幸好暫時只需輕拍下佢就可以瞓番,雖然無端端半夜比佢醒會有啲炆,但見雨恩佢自己都瞓得唔好,又引發一點同情,怒氣全消。
BB技能解鎖:
- 自己坐直
- 在搖搖床上自行控制躺著或坐起來
- 坐著沖涼玩水
- 餵食米糊,仲有果汁以外的東西,魚菜蛋豆腐…
- 試著拉拉褲,換片時會爬走
- 改穿過頭笠既衫仔
