產後病房 第一晚
病房裡不寂寞
姑娘提醒產後媽媽八小時不準落床,飲食大小二便都要在床上進行。進產後病房時大概晚餐時間,剛體力透支加上聞得太多笑氣仲wingwing地,食左少少飯覆左幾個msg就瞓著左,一兩小時後扎醒,有位教手擠母乳既姑娘黎搵我,一對一親自教授,我好努力咁試都擠唔夠1cc,之後佢去教完其他人後特登折返黎搵我,最後擠到2cc(半支小針筒左右),姑娘幫我交支人奶去收集箱,再轉送到嬰兒病房比BB。感激佢既耐性同埋佢願意用收左工既私人時間再黎幫我!係陌生既環境下帶來一點溫暖。凌晨終於落得床,姑娘簡單介紹產後病房有咩設施,教埋點洗傷口,就被趕上床瞓覺了。
生產之前陣痛左咁多日又遇著肺炎無探病無陪產,默默頂硬上,都有向上帝問過點解要我經歷呢啲野?但當去到產後病房見到另外七個媽媽,個個都係一人上陣咁走過呢段時間,加上唔係個個懷孕同生產過程都咁順利,好明白點解會形容生仔係搵命博…心裡面非常敬佩著她們,每一個都是英雄!其實我是很有福的。有人問,生完一個人係醫院唔寂寞咩?病房裡有大有細,都是人呢,那裡寂寞!而且總有幾個新手媽媽應付BB時明顯一臉徬徨,大家說說笑笑互相問候同得安慰。
嬰兒交響樂團
同一個病房裡有幾個媽媽既BB都無伴在身邊,估計都在嬰兒病房,而其餘媽媽床邊既BB哭聲不斷,喊肚餓喊換片喊唔知乜…加埋與附近病房既嬰兒喊聲一齊共鳴,絕對是一場交響樂。嗰刻我竟然完全唔覺得嘈,不時還會偷看隔離床既BB,好想聽到自己個囡把聲係點啊~想著想著,便睡了…
你以恩典為年歲的冠冕;你的路徑都滴下脂油。詩 65:11
心中沒有神就看不見衪的工作,原來恩典早已放下。
充實體驗日
一瞓就係第二朝七點,由於好多日無瞓過覺,醒來一刻便感恩。陪隨著周身肌肉酸痛才醒起昨日用了全身氣力生 BB,但因為BB還在病房觀測中未返到我身邊,感覺還不真實。前一晚生B出了一身汗,醒來即衝去洗手間沖涼梳洗,遺憾無法洗頭,因為沒有吹風設備,也沒有插頭可以提供。吃過早餐,醫生巡房,姑娘提示開始要擠奶了。十點有產後及出院講座要去聽,有趣的場景是,病房內的媽媽因為傷口疼痛行走起上來都像喪屍,即使坐下來每個人都會不時扭來扭去,姑娘們都見怪不怪非常理解,友善地講解產後注意事項。
懷孕以來醫院一直提供既資訊都好全面實用,就算每個媽媽都係新手一張白紙咁,由產前到產後給予既教育都好足夠,只要有認真溫書的話,每個人都可以慢慢掌握到點去照顧自己同 BB。聽阿媽講當年係公立醫院生之前同之後都無乜資訊教育,住院時間仲長啲,傷口癒合後要再返醫院拆線,無而家技術咁好添。感謝姑娘們好親切盡心去照顧我地!間或聽到佢地吹水話:醫院抗疫物資得番一個月都唔知點算,到時點返工?聽到都覺得心痛,疫情期間佢地咁勇敢企係最前線工作,應該要有最多既support呢!
講座完後夠鐘再擠奶,中午吃過飯,又擠奶…因為未上奶,但又想盡量擠多啲比BB,所以每次都花上好長時間。傷口痛,點樣坐都唔舒服,過程不好受,奶量雖然好少但每次都有少許進步。當我全神貫注擠完奶之後驚覺錯過了可以探BB既時間!醒起之前姑娘講過,正常情況下今晚BB會推番黎,所以都安心等待,但到晚上八九點BB都無被推返黎呢…唯有等第二日探B時間去問個究竟。晚上十點擠完奶經已好攰走去大覺瞓。
從他豐滿的恩典裡,我們都領受了,而且恩上加恩。約 1:16
當媽生孩一連串的經歷相當痛苦,但感恩神豐富了我生命的體驗,有另一層次的提升和體會。人生只會活一次,豁出去吧!
產後病房 第三天 出院
乳牛模式啟動
凌晨十二點姑娘抄醒我問會否擠奶,朦朧之間我拒絕了…到凌晨三點再問,我又拒絕了。之後我突然驚醒生左 BB之後不能再這樣大覺瞓喇!奇怪的是,點解前晚唔覺有人叫我起身既?良心發現過後起身梳洗沖涼,但我留意到彷彿只有我一人會洗澡,心裡想:其他人都不注意衛生去順從那些禁忌嗎?奶擠後小休一會吃早餐,醫生巡房檢查傷口,再擠奶,睇房內電視定時既教學短片,又再擠奶…今日我好勤力啊,凡有空檔時間都擠奶呢。下午四點一行幾個媽媽都前行去嬰兒病房探 BB,在大堂等候期間遇上另一個產前病房見過的媽媽,原來因為她順產不成功最後要開埋刀,聽後我心裡一寒,再次覺得自己經已非常非常非常幸運!
寶寶初見
入到嬰兒病房,有點迷惘,個個BB都差唔多樣,邊個先係我嗰個?原來床下掛有媽媽的名字,終於見到BB喇!向姑娘了解,BB因為出生時有嘔過,而且發炎指數在臨界線,所以要安排打抗生素觀察,感恩觀察呢兩日狀況維持正常,仲可以抱下 BB,由於淨係得媽媽可以入嬰兒病房,我就打視像比老公睇下 BB,探病時間結束同時我辦出院手續,疫情下出院後無得黎探 BB,每日要等醫院電話跟進狀況喇。夜晚返到家仍然不忘每三四小時擠一次奶,BB未返身邊,我唯一可以為佢預備既就係呢啲,另一邊廂我可以爭取時間補眠休息,之後唔知幾時可以有得瞓喇,所以要感謝神呢!
你躺下,必不懼怕;你躺臥,睡得香甜。箴 3:24
有耶穌係大廳,使我可睡得甘甜。
出院 第二天
我等你電話啊
因為要等電話,又驚會miss call,所以較到最大聲,心情也常在緊張狀態,不停翻看電話。下午收到醫生電話跟進,話BB情況ok,但要再抽血檢驗合格後才知是否繼續留院,等明日再通知。如是者呢日我又 keep住擠奶同休息…
新生爸媽實戰
中午收到醫院電話 BB可以出院了,等左咁耐老公終於可以抱到 BB喇,返到屋企之後就開始幫 BB沖涼,然後餵奶掃風換片泵奶不斷循環,有點手忙腳亂,但好在係陪月班學過既野都用得著。第一個晚上到凌晨 BB經已食曬我這兩天擠落既奶喇,我既奶量追唔上BB既食量…加上半夜要不斷札醒去餵奶、掃風、洗野、蒸奶樽…開始感覺不妙。
BB出世 第六天
奶粉補給
朝早餵完最後一包人奶,派老公出去補給物資,買左奶粉之後個人安心曬,即使泵奶量未夠都唔驚 BB無奶吃喇。而每次泵奶都繼續見到奶量有少少進步呢。上陪月班時教過要mark低BB食奶量、大小二便既次數同時間,因為每次BB喊都要估佢喊乜,而且當另一人接手時可以易啲跟到BB大概幾時需要啲咩,濕片既次數亦反映奶量是否足夠,定時食奶可以幫BB快啲進入規律進食模式等…裝個Apps黎紀錄,我同老公都一目了然。
懼怕人的,陷入網羅;惟有倚靠耶和華的,必得安穩。 箴 29:25
雖然BB要留院,心裡好會掛住,但卻有平安,連生仔咁慘痛既事神都帶我經過了,知道神會保守令佢健健康康出院呢~
BB出世 第八天
健康院檢查
正值下大雨的一天,要帶BB去母嬰健康院做第一次檢查,呢個檢查既安排對剛生完既媽媽黎講,根本係一種懲罰,傷口痛到不得了,腰又酸,走入人群當中怕行得慢阻住人,又怕被人撞親。加上肺炎疫情嚴重其實真係好唔想帶 BB出去,推著BB車用半個鐘走原本十五分鐘既路程,過馬路格外留意車輛,要避開食緊煙既街坊,大雨怕滴到車內…好不容易才到達。基本身體檢查後會面問診,會問埋屋企情況,邊個負責照顧 BB等,有需要佢地可轉介其他社區支援協助,好欣賞有呢方面既關顧,好貼心。知道頭嗰幾日 BB在嬰兒病房我無機會實習點樣親餵母乳,就安排姑娘再教我。然後醫生 check到 BB一邊腳力量唔係好夠,其實只係輕微既狀況,但都出轉介信比BB去醫院睇一睇骨科,再一次比我感受到香港既醫療真係好好,照顧既層面全面過於我地所想。
BB出世 兩週
疫下湊B生活
24×7單一重覆日日唔夠瞓困係屋企既湊B生活,我同老公經已好攰。係BB兩星期大既時候,我地驚嘆呢種狀況要維持幾耐呢…以前打過一份工一星期有三晚加班到凌晨十二點後先收工,以為算係最辛苦既工,原來我從前實在太天真喇,做全職媽媽完全係另一個層次既工作…開始懷疑人生,實在唔明點解上一代可以生咁多個!唔明點解生左仔仲可以返工!唔明點樣可以堅持到餵全人奶!唔明日日都唔夠瞓又無停咁照顧BB,身體點様可以撐得住…
天下的父母,我們終於初嘗你們的勞苦了,因為我們都加入了你們的隊伍…
有人話,當你見到自己既BB咁可愛,可以健康成長,就會幾辛苦都會忘記喇~我就無辦法欺騙到自己喇,BB係好可愛亦希望佢健健康康,但一切一切,都好痛苦,這是我真實的感受…另外傷口到而家仲痛緊,不斷出緊惡露,係屋企行都要小碎步,坐低都一定要放個水泡仔先坐到,否則痛到飛起,舉止行動好似老人家咁。疫情下既生活減少出街,每天對住四面牆,但卻要感恩!因為原本老公得五日待產假,而家有超過四星期 home office時間可以陪我坐月照顧BB,幫輕左唔少,否則係身體未復原下仲要一個人湊 BB真係搞唔惦!睇新聞時留意到,係BB出院後才有更多肺炎確診病人到聯合醫院就醫,當中都有神既保守!神在安慰我祂必會繼續帶領我地之後既生活。
好懷念可以大覺瞓、天氣好可以出街逛逛拍下拖、係屋企可以做下自己野發下呆…等等既日子喇~FF完還是面對現實吧!而家大概掌握照顧 BB既生活節奏,不過預計到老公WFH完結要返番工時就再有變動,有點不安。
全人奶的起點
呢幾日BB經常谷便便不斷喊,面又出滿紅疹粒粒,懷疑係奶粉問題啦,問埋各方媽媽既意見,決定停一下半夜嗰餐既奶粉,辛苦啲餵全人奶,開頭有啲掙扎,因為一日泵五次奶經已好攰喇,半夜要再起身泵,但為左BB我再一次頂硬上…Just Do It !!! 果然過左幾日便便靚番曬,心都定番曬~原來BB既便便都可以咁影響我地既心思。如果種植白米係粒粒皆辛苦,咁人奶都一樣滴滴皆辛苦!
學習每天感恩
相信係上帝知道我軟弱,痛苦的同時讓我地睇見恩典。由知道懷孕以來,收到好多好友既物資為BB送上祝福,好感激佢地既慷慨,我地知道唔係必然,都是恩典。所以每日每用到好友們送的東西,例如泵奶時、蒸奶樽時、幫BB穿衣服時、推著BB車時…都感恩一次,比我地keep住記得上帝既恩典!感謝好友們的愛,感謝天父愛我們!
BB出世 三週
人生不會只有晴天
老公突然接到醫院電話,在院留醫兩星期的爸爸情況突然轉差,當日近傍晚離開了…老公需要返去同家人處理後事。生與死都掌管在神手,神比我地係呢段時間經歷呢啲事,心意係咩呢?求主安慰一家。呢日淨番我一個人湊BB,捱左一日就經已好攰好攰…幾乎無點休息過,但諗起老公都辛苦,要兼顧兩邊走來走去,我自己都要努力頂住呢,要做好自己嗰部分,咁老公先有時間精力去盡佢該做嗰部份!
人生變化多端總唔會每段時間只有一件大事發生,不同既事件就係有機會重叠而來,記得從前我係谷底裡有個牧者同我講過…今次你既生命經歷過兩個困難同時發生,依靠神恢復過後,你要期待自己下次有三件惡事同時發生時都能夠繼續依靠神度過!當時我聽完心裡萬般不願意接受,上帝祢做咩咁睇得起我!
你們要將一切的憂慮卸給神,因為他顧念你們。彼前 5:7
只有聖靈同在給予的平安才可真正安穩人心,沒有別的。
