HAPPY BIRTHDAY TO YOU !!
給女兒寫了第一張生日咭，今日睇唔到唔緊要，爸媽幫你儲起來，待你看得懂時，全都歸你！
請你記住不需在乎某一點的得失，人生是一條線，知識早晚都會過時，只有信仰、希望和愛能夠永續。單為自己建立的東西只影響一個人，為他人而建立的可以影響世界。爸爸媽媽希望妳的眼光能夠深、闊、遠！
無得偷懶
雨恩一歲再到健康院打針，連打三針喊完好快收左聲，體重保持到，各方面健康。開始行到三四步，就戒用學行車，多左放佢自己係墊練習，一歲兩星期就可以放手自己行，進步神速又令我驚訝。姑娘建議午餐份量跟晚餐一樣多，平日晚餐婆婆煮既餸菜會預留比雨恩啱食既野，而家輪到我要溫書做功課，研究煮咩午餐了。沒有可以偷懶的機會，雨恩刷新技能同時我都要轉換工作內容，還好我不抗拒學習新東西。夜晚煲youtube學煮餸成為我新既興趣，原來”興趣”這東西是可以為他人而建立的，以前的我實在太自我中心了。
接住新年假期連續不停的拜年，因為疫情好多親戚都係第一次見雨恩，要湊住雨恩一齊周圍去拜年比往年更累，但雨恩表現良好無點扭計肯比人抱，仲逗左好多利是添。
成功戒人奶
冰奶倒數所剩無幾，呢排不斷比雨恩試飲普通牛奶，佢竟然唔肯飲！向來雨恩咩都肯放入口，目前唯一唔肯飲既就係牛奶。諗住試飲奶粉但好驚佢又唔肯飲，因為而家朝早老公餵完一支奶比雨恩就返工，然後雨恩玩一陣又會再小睡到中午吃午餐，時間節奏控制得好好，又令我有足夠休息，如果雨恩唔肯飲奶粉，可能要特意起身整早餐佢食，大家生活習慣要再調整。請教其他媽媽意見，去買左罐奶粉， 下午茶時間試沖少少比佢，祈左個禱先餵雨恩， 最終佢唔抗拒飲曬，放下心頭大石。我要宣佈：製奶工廠正式收爐了！
耶和華，是有憐憫有恩典的神，不輕易發怒，並有豐盛的慈愛和誠實，出 34:6
沒有神恩典，日子實在捱不過去，謝謝祢不捨不棄的愛！
學行
一歲兩星期帶雨恩落公園放佢落地學行，看著雨恩小手捉住爸爸一拐一拐學行時，這畫面令我諗起，自己曾同老公講過”好難想像過幾個月雨恩就會拖住我地隻手行”， 到呢一刻見到其他BB會跑，又會期待佢快啲學識，仲有自己可以玩滑梯，對雨恩來說會多好多樂趣。誰知隔日再帶雨恩落公園散步，佢就自己連續行到好多步！有無進步得咁快呀？自此，我地就盡量製造更多機會比佢練習，周末帶佢去行草地，平日到公園空地走走，飯後放落地散步，行得夠仲有個好處係夜晚訓覺訓得好啲。
今晚要講那個故事？
夜晚瞓覺時間，有時會叫老公講故事比雨恩聽，開頭佢跟啲BB書講，講講下嫌唔夠刺激就自己作故仔…老公會先開床頭音樂燈，將雨恩瞓低蓋被，然後開始講故事，老公魔性既講野tone， 聽到連我都想瞓，5-10分鐘內寶寶就乖乖睡著了。呢排有趣的是，朝早BB醒左但見我地未醒佢會自己再按音樂燈既制，瞓住係度聽音樂，仲會隨心情轉歌添，好厲害！
每日精選：
FunFun羊打獵獅子
無毛羊與奶奶
黑山羊日記
哈薩克野狼大戰西伯利亞雪橇貓
劇場版：
FunFun羊教室之
雪條銷售策略
BB技能解鎖：
- 開始自己走到幾步路
當媽一年了
我們的人生因為雨恩既出現，經歷左無數既第一次，面對要照顧呢個新生命，充滿壓力同挑戰，百感交集。漸漸適應了當媽的生活，習慣了凡事先為她考慮，生活的大小事都一手一腳照顧妥當。回想自己細個時會覺得奇怪，點解爸媽吃飯時總將最大舊魚肉夾比我食，佢地就只會吃魚頭魚尾？而家我當媽後，自自然都會咁做；細個唔明，點解爸媽只顧工作，咁少休息陪我玩，而家明白經營一個家需要許多開支，爸媽工作其實都很累，只是生活所迫而犠牲自己既休息時間…短短一年間，從爸媽的角度，體會了很多很多！
隨著佢既成長，將來開始上學時，我地既生活模式又會一起轉變，兒女成長唔係一個人既事，原來係一家人既事。天父放上幾多心機栽培我，我都希望可以盡力去栽培雨恩，將我地畢生既絕技、經驗都傳承比佢！更緊要既係可以將我地人生經歷過既高低起跌，係神裡面得著既恩典同教訓，都同雨恩分享，建立佢既生命。
