產兆第一天
第39週0天,朝早發現見紅,量很少而且無其他唔舒服,所以諗住再觀察下先,下午仲出左去飲茶添~觀察左大半日都無再出血,直至半夜…
產兆第二天
入院待產
第39週1天,本應當日要到母嬰健康院做產檢,但前一晚凌晨開始有陣痛加再次見紅,由每次10分鐘到朝早九點就每次隔7分鐘,成晚無瞓到,叠埋心水諗住呢日終於到喇!起身之後拎埋行李同老公食最後午餐上路
了,感覺還得輕鬆~ 中午到醫院登記入院,因為肺炎緣故知道無得探病之餘都無得陪產有啲失望,但都無辦法啦,頂硬上!跟老公道別後,深個呼吸就踏上這孤獨生產之旅!
產前病房所見所聞
上到產前病房,聽到有啲媽媽話係見紅 / 陣痛入院,各人進程不同。而我入左院幾個鐘後,覺得陣痛反而開始疏落左,姑娘見狀話:係家,有時BB係會欺騙你家~等下啦~第一日同房有個媽媽下午仲好好地5-10分鐘痛一次好快就變左2-3分鐘一次,而且出血量好多,幾個姑娘幫佢檢查,開左兩度!但姑娘表示產房好爆未有房,安撫佢要等下,到傍晚佢開始發出哀鳴聲求救…過多陣佢拍
櫃不停喊叫姑娘話穿左水,幾個姑娘衝入黎幫佢檢查,開左七度!氣氛變得好嚴肅,當時產房有位喇,即刻將佢既行裝打包推左佢離開。全間房既人安靜咁睇住成個過程,當下感覺有啲心寒…
我的力量啊,我必仰望你,因為神是我的高臺。 詩 59:9
晚上我正諗住好啦今晚好好休息既時候,半夜又有番陣痛,都係10分鐘一次但係痛感係強左同埋有規律,結果就係成晚都瞓唔到…另外,原來係呢個時候收到好多人既msg問你生左未時,係會有壓力同不安,一方面好努力咁忍受痛楚,同時無奈結果唔係自己可以掌握的…
產兆第三天
緩慢既陣痛進程
第二朝到醫生巡房時陣痛6-8分鐘一次,而佢既回應係:等到你3-4分鐘一次先再檢查啦。原來呢個強度都仲係算弱…但個痛度足已令我唔想郁而且腰很酸痛,除左出入廁所之外,全日都係瞓係床上。下午老公到左醫院電梯堂度等我,但我根本行唔到出黎,唯有隔著空氣感受老公的陪伴。到晚上,痛楚明顯加劇,衝去廁所嘔左一次,一直痛到凌晨三點時大概3-5分鐘一次喇,姑娘幫我內診話:仲未有度數呀,再等下啦,仲安慰我話可能第二朝有進展呢!唔係嘛…仲要等到第二朝…嗰陣我好失望,因為每次陣痛黎我都已經痛到郁唔到好辛苦,靠大力抓住扶手深呼吸去過度,無幾耐我忍唔住係床邊嘔喇…
同時間另一張床有個媽媽痛到慘叫:姑娘頂唔順喇,我好急呀!佢當時2-3分鐘痛一次喇,即時姑娘幫佢內診話左開左五度喇!突然間又有一班人衝黎將佢既行裝打包連埋成張床推左佢去產房。
雖然個場面係好緊張又好恐怖,但自己竟有一絲羡慕,希望自己可以快啲入到產房呢…
呢三日因為不斷既陣痛,連老公既短訊都無乜點回,事後睇番真係令佢擔心又焦急,係醫院係屋企苦苦咁等待但又唔知我狀況,辛苦了老公!另一方面係忍受陣痛中我確實無野可以依靠,就算同老公講佢都唔會完全理解嗰種痛苦,只有上帝先幫到我有盼望去繼續忍耐。亦感謝神,我可以依靠衪!
產兆第四天,進入產程
好難捱的一夜,我諗好左第二朝向醫生request催生既請求,如果佢唔肯我寧願轉院開刀喇…早上連早餐都食唔落,終於到醫生巡房,內診確認有兩度喇!可以排隊落產房~雖然姑娘話我應該無咁快,第一胎預每一個鐘開多一度啦,同埋因為我有B鏈,生產之前話要打兩針,大約八個鐘,但心裡面好安慰,起碼見終點丫!之後就一邊痛住一邊慢慢執野啦,突然間有個姑娘推住輪椅走向我身邊:下,你仲未執野呀?我好疑惑回佢:唔係要打針起碼八個鐘先生得咩?姑娘:唔一定家,嗱嗱林啦,你而家要走喇!不斷咁催我上輪椅,同時拎曬我啲行李走。再道:你而家打比你屋企人啦,要熄電話喇!就係一片混亂之間我只夠時間留左一個msg比老公就被監視下要熄電話喇…
入產房
前一晚仲聽到姑娘話產房好爆,今日咁快安排到入去都感恩!產房原來係一人一間房,到步時大約11am,產房環境無想像中可怕,可能因為呢刻個腦淨係想速戰速決!上了手術台姑娘駁好儀器簽好同意書,再幫我內診同人手穿羊水:而家有三度喇,你再等下先!轉個頭有個醫生走入黎話我啲羊水有少許混濁,萬一加埋產程進度不理想的話有機會要開刀同輸血,又比左張同意書我簽,跟手抽埋血,然後佢地就走曬喇。 COME ON BABY! I AM READY!
每次陣痛來襲,我都用力抓實床側扶手及以呼吸法應對,相信如果抓住既係老公隻手,應該要斷了。期間不斷有姑娘出入check我既宮縮強度,血壓,BB心跳等…過程中姑娘幫我吊針落抗生素+鹽水+宮縮加強劑+聞氧氣,陣痛夾雜急便便的感覺,我知道呢個時候唔應該用力痾,怕會影響到BB,但有好多下都忍唔到…因為嗰道子宮收縮既衝力都好大,順住去痾反而令我好受啲。
耶和華是我的力量、我的詩歌、也成了我的拯救。這是我的神、我要讚美他、是我父親的神、我要尊崇他。出15:2
難忘的過程
不知不覺過左約兩小時,姑娘再內診:嘩!有七度喇,你入左黎唔係好耐咋喎,好叻呀!仲要唔洗聞笑氣添~我手都舉唔切想同姑娘講要聞氣,佢就走左喇…心諗唔緊要,好快有其他姑娘會進出的。無幾耐就有人入黎我即刻叫住佢,宮縮時試左聞幾下,好似無任何減痛作用既…但當時唔理得咁多點都聞住先。過左一段時間,我開始痛到慘叫喇…繼續不斷有唔同既姑娘 check住我既狀況,不斷講:仲未得呀 bb個頭落得未夠低xn…急便便既衝力感覺越發強烈,有一下既陣痛完feel到肚入面BB向下移動了,當下感覺令我好驚訝,亦有點「有趣」?!去到某一刻姑娘call咪:xx號房出人!隨即有三個人衝入黎叫我忍住先,好快手咁set好個場,有個姑娘望到我個肚就話:哦!個肚好細啫,一陣應該好快生得出。另外有姑娘叫我向下移近床邊,將雙腳放上腳架上,舖左塊手術布係我大脾上,提醒千祈唔到掂到,確保生產範圍皆無菌。安頓好一切,叫我抓實手柄宮縮時就用力痾,然後所有人站在床尾,氣氛變得嚴肅。腦裡面記起上產前課時有教,生產那刻用力痾同時要hold住。陣痛來了!用全身既力抓住扶手痾佢出黎,hold住道氣一陣,有人叫我:呼呼呼!BB經已出左一半喇!當下其實自己完全無感覺,姑娘唔講我都唔知道出左,放鬆回完氣再用力痾多一下BB就出曬。望望鐘當時接近4pm。
諗起老公過去幾個月禱告BB一生就出,的確感恩BB好易生左出黎,但祈漏左既係,陣痛唔好last咁耐,前前後後痛左三日呢…
進入產房呢五個鐘,感覺過得好快,但即使產後多個月諗番都會毛管豎,驚嘆當時究竟係點捱過?但最緊要既係多謝耶穌,在艱難既時刻同我一齊度過左!
之後幾個姑娘各有各忙,有個叫我瞓響度休息下,幫我娩出胎盤,仲讚我好叻,因為聞得太多氣令我wingwing地,嗰刻雖然我唔識回應,但慶幸有人係身邊支持同鼓勵。躺下那刻才發現自己成個背脊出汗濕曬,心裡說終於完喇!望向嬰兒床先發現唔知幾時走左個男護士入黎,係度處理文件同檢查BB…有個姑娘走去我度同我講BB既出世時間、幾重、打左咩針…等等一堆資料,但我一句都聽唔入耳囉…腦裡面仲接受緊剛剛發生既一切。之後姑娘抱 BB放左係我心口,第一眼見到佢時,當下覺得好感動想喊,BB郁郁下既時候同我胎動既感覺一樣家,好親切!一路同BB傾住計,姑娘好忙咁幫我縫針,雖然話打左麻醉藥但每一針拉線基本上我都feel到,佢地仲贊我:好定喎你。咁緊係啦,當對方手拿著利劍武器,而我無還擊能力,亂郁的話受罪的都是我呢!我點可以唔定呢?縫完計姑娘教我keep住按肚幫助子宮收縮,留房觀測左半小時後再過床準備被推上產後病房,因為我有B鏈關係, BB要送往嬰兒病房觀察廿四小時,就先被推出產房了。我隨後被推出,姑娘問:你屋企人黎左未呢?我回:唔知呀…但心裡知道老公應該係度。果然出左走廊就見到老公係度影緊BB,短短幾分鐘,我地三個相遇又分別了。產後被推到產後病房,我在手機群組裡向弟兄姊妹大嘆:呢幾日我去左地獄!人生中暫時受過肉體上最苦既痛算係呢次,而BB出世後,原來呢個只係開始…接住既幾個月又係另一種精神上既折磨惡夢…
瞬間由準媽媽成為人母,有點不知所措既感覺,而將來每一日都會不斷變化,充滿挑戰。神啊!求你繼續掌管我的心,
箴4:23 你要保守你心、勝過保守一切。因為一生的果效、是由心發出。
