首次見面
除左公立醫院既檢查，另外都預約左係第9週去私家照超聲波。 係我地第一次同BB首次見面，佢就好似一粒腰豆咁仲有一隻小手手向我地揮手，超可愛~見到腰豆中心有個位閃下閃，顯示既就係佢既心跳，醫生開埋聲比我地聽，嗰刻我忍唔住流左滴眼淚，好感動！生命就這樣形成了。
由於剛懷孕胚胎細小，有機會要用陰超先照到(比較 尷尬的)，當時我第九週直接肚皮照超聲波就照到 了，注意照之前要飲水至有急急地既感覺，會照得清晰啲。呢次檢查除左Check胎心跳、會量胚胎尺寸係咪符合週數、胎囊著床位置、子宮有沒有其他 異常。BB一切都正常令我地都好安心~
身體變化
另一邊廂，身體變化既唔舒服令我係返工既時候好難集中亦特別攰，朝早係公司電腦面前邊食早餐竟然可以瞓著，夜晚九點一落床就瞓到第二日。胃一直痛不時反胃要嘔，試過各種方法希望減輕孕吐反應，飲檸檬水、薑水、食梳打餅、少食多餐等…對我黎講全都無用，而且荷爾蒙既變化下頭痛不斷也容易作嘔，記得當時正值夏天， 試過收工搭地鐵太焗，同試過書局企得耐少少，就冒冷汗頭暈， 眼前變黑作嘔，衝出去有櫈既地方休息先慢慢無事…直至到開始買葉酸食，胃既唔舒服減輕左。
病唔舒服只要你唔覺意傳染左比另一半，佢都可以感受到嗰種痛苦。但懷孕過程既不適係男人們呢世都無得經歷既事，只有作為媽媽既先會知道，母愛總是偉大呢！今日嘔到七彩、食唔落、瞓唔到都好，聽日起身又可繼續為愛的打拼！
自己照顧自己
準媽媽係呢個週數既尷尬位係,因為未見肚無人知你大肚有需要,食野無胃口時同事會叫你唔好減肥;返工恰眼瞓會覺得你偷懶;搭車時勁想坐關愛座都無人會讓比你…但感恩每到頭暈危急有需要坐低抖既時候就咁啱搵到地方休息,神在默默看顧呢。到第一次公立醫院產檢既日子,抽血、驗尿、磅重、睇短片簡介、見醫生…而係無意中比我發現該醫院產科門診服務時間原來只有周一至周五…當下諗起第一次醫院登記時本身諗住周六但因病提早了兩天,剛好Fit番醫院時間,否則就白行一躺,神既工作連我地大懵既位都幫我地補埋,很貼心呢!
公立與私家產檢都需要
12週公院照產檢超聲波度BB頸皮=唐氏篩查,BB好健康咁彈下彈下,不過比醫生笑我膀胱儲左太多尿搞到照既時候BB偏埋左一邊,原來呢個週數既BB夠大,經已唔洗係急急地既情況下照喇~哈哈
16週的某天突然心血來潮覺得係時候Book定私家照結構,上網查左幾間婦科診所便打去,但原來要化驗診所級數先有照結構既設備,再打了好幾間都Full左或者只接受轉介,心裡越發焦急,最後都搵到一間有位便成功Book了~
他使萬事各按其時,成為美好;他又把永恆的意識放在人的心裡;雖然這樣,人還是不能察覺神自始至終的作為。傳 3:11
