迎來第一個母親節

我的身體狀況

產後接近第三個月,久違的月經重來,以為餵人奶可以拖耐啲,結果都離不開「因人而異」這四隻字,不過起碼證明自己子宮回復力不錯,未來再要花上幾個月讓牠自行完全調節至之前的狀態,身體的結構真是奇妙!計一計,而家我既休息時間晚上十二點左右,跟雨恩一樣可以瞓到八點半,然後一日既生活又循環,比之前兩個月精神得多!

寶寶在努力成長啊

雨恩日睡時間少了,多左時間鬧著要玩,有時要坐搖搖床,有時要學企,有時要我抱住佢周圍行,要估啱佢想點,滿足到佢先至唔喊。食飽奶痾左屎心情好,就會好亢奮腳撐撐自己係度玩,依依呀呀講野,每日發出既聲音大細長短都有啲變化,雨恩用各樣方法提醒住我地,佢在不斷努力成長啊。好想雨恩快啲識講野,我地就唔洗日日好似傻仔咁自言自語。

踏入夏天,著過唔夠十次既厚厚靚衫著唔落 lu, 初生嬰兒著既衫生命線真係好短,所以就算送禮都好,尺寸買大啲會好啲~送錯季節的話可能連著既機會都無呢。幫雨恩沖涼時明顯見到佢身長得好多,而家有接近成個浴盤咁長,撐起腳會惦到盤邊喇,仲會踢起水花添,雨恩大隻左同時掙扎力越大,要捉得更緊。而家雨恩體重已經係出世時既兩倍,抱一陣我就手軟,腰骨手腕都會痛。不過見證著雨恩既成長,每每令我驚歎造物主工作既奇妙!

我要稱謝你,因我受造,奇妙可畏;你的作為奇妙,這是我心深知道的。詩 139:14

疫情緩和

疫情稍稍緩和終於帶左雨恩去見佢嫲嫲,姑媽同表姐~表姐仔對住雨恩BB開頭有啲怕羞,後來主動聊佢玩。帶雨恩出街過程雖然好麻煩,但到步有人同佢玩,分擔下湊BB既工作,可以為我地換來放鬆食個飯的片刻。感恩好多人咁錫雨恩,放心將來可以有好多人陪佢成長~

母親節

第一個母親節,可能因為雨恩未識講野,無乜特別感覺,但好明白做媽媽既辛苦,第一張三代同堂既合照,有媽媽、我同雨恩,係我最期待既~原來我地三個都係豆豉眼同右邊面有小酒窩!好神啊~遺傳都係一樣幾有趣既現象,是屬於自己下一代既印記。

天跌落黎既freelance

呢期老公幫我接左個 job,幫佢department執cad圖放上google map,感恩有新電腦同埋有細佬幫我裝到最新版既software,一切都齊備曬令我覺得根本就係天跌落黎既freelance,一黎可以運用我久違既專業,藉著做呢個 job仲可以比自己知道一邊湊雨恩既同時工作能力淨返幾多,最終兩日做得完既 job,分左近一星期才完成。

跟我躲貓貓吧

雨恩動作等既成長都發展得好快,一天佢識得用手仔拎住紗巾幾秒鐘,過幾日佢就能夠抓實小魚玩具揮動;另一天同佢玩躲貓貓,過幾日佢又學識左,自己抓住紗巾拉開又收起在笑,雨恩人仔細細就有咁強學習能力,多厲害!可以連續半小時不斷發出怪聲,婆婆仲笑說雨恩可能好快識講野。

受寵

有一日婆婆出左去成個下晝,話去左好多間商場,原來係為左搵學行車比雨恩,雖然我知道醫學上唔prefer, 但呢個係佢對雨恩既心意,唯有順佢意,漸漸地發覺雨恩開始介入了婆婆既生活。婆婆仲會不時餵一兩啖仔提子汁呀,汽水呀…比佢淺嚐。心裡知道婆婆餵既野太高糖份,但阻止到一次,佢就偷偷餵第二次…而晚飯時段,我地都開始習慣雨恩會瞓係搖搖床依依呀呀陪住我地食飯。