曬太陽
踏入八個月疫情有少少緩和，加上泵奶時間調節疏了，下午有些空檔，係時候解鎖自己既技能，嘗試自己帶雨恩到附近公園曬太陽！之前都係同老公一齊先會帶雨恩外出，因為之前雨恩未識坐，出入一定要推BB車，遇到要上落樓梯位比較麻煩，一定要兜路找升降機，後來坐得穩啲可以放心用揹帶帶雨恩出街。成功過一次之後，每星期都盡量有兩日帶佢出去，亦等我自己有機會走動下。
野餐
曾經幻想可以同寶寶一起野餐，配合秋涼既天氣，機會終於來了。帶食物飲料、嬰兒用品、米糊、熱水、餐具、野餐墊、帳幕、BB車…執左一段時間先出到門，不過去到其實係BB吃BB食物，大人吃大人食物，影下相、曬下太陽，算係比雨恩既初體驗，行下草地。見到前面對母子，好chill咁瞓係度睇書食生果，心裡決定了，我之後就要咁嘆同雨恩撐枱腳！
BB技能解鎖：
- 站立幾秒
- byebye動作
我所見為善為美的，就是人在神賜他一生的日子吃喝，享受日光之下勞碌得來的好處，因為這是他的分。傳 5:18
我的身體狀況
身體經過過去七個月既時間，今個月經期既日子同量終於都回復生之前的狀況，前幾個月日子有點亂，經期長，量又多，令我好煩躁；配合做骨盤底肌肉運動，漏尿問題也有攺善；另外，體重都係無刻意節食下回復了，因為餵人奶成日覺得肚餓，其實仲食多左添。
近期頭髮開始蓬鬆，去剪個髮，同髮型師投訴係咪上次剪得太碎，好難打理啊！檢視後結論係因為我產後影響頭髮變得脆弱，自然斷掉，所以長出一堆”BB毛”，不過我本身頭髮多，等佢自己生番出黎就得，唔需要特別打理！聽到呢句心就安落曬喇。
兩母女一齊成長進步
八個半月，雨恩偶然可以自己企到幾秒，無端端識得拍手，又會十指緊扣，雨恩既進步有時會令人覺得可怕，不知鋼鐵是何時自然鍊成的，難道你在半夜自己偷偷練習嗎？同埋呢排雨恩乖左，早上起身飲完奶會自己係床仔玩，玩玩下仲會瞓著番，等我可以專心泵奶，覺得好安慰。
八月三周，教左好耐既byebye終於識做，原來早啲教唔代表早啲識。多左出街後，我同雨恩個膽都大左，我可以自己帶佢去遠啲既商場買野，仲會搭車出去接老公收工添。
多謝雨恩陪我一齊成長，我都做左媽媽八個月喇，日後繼續多多指教！從你身上我更學會了忍耐，安靜以神為神。
老豆生日Staycation
話說生完雨恩無耐，有一排發現房間地下滲水，原來係由廁所牆身防水膠爆左，如要施工就要將廁所內所有地磚連坐廁起曬出黎重舖，廁所一兩日無得用，被房署一拖再拖下終於安排到日子做工程，而施工嗰日正好係老公生日，有完美藉口令我地可以順勢去酒店住幾晚staycation，一家人一齊同老公慶生，自己點安排都唔及上帝預備得剛剛好，神的恩典令人窩心，疫情下以往日一半既價錢就住到四星酒店，好滿足！
為方便家人出入，揀左間近近地既酒店。正日那天帶埋雨恩到海濱公園逛，夜晚同埋媽咪細佬一家去左附近一間西餐廳鋸扒~第二朝老公要返工，返工地點同酒店距離不遠，中午可以等老公買lunch上酒店房食，下午就自己推雨恩去海濱睇日落，始終要泵奶同時一個人睇BB都有啲麻煩，不過對我黎講係踏出左一大步，起碼試過帶雨恩去其他地方過夜，到雨恩再大啲識行加上戒埋奶相信會更輕鬆，可以帶佢去更多地方玩，好興奮啊！
四處拜訪
欠下許多見雨恩既債開始要還，先帶雨恩去朋友屋企探訪，之前雨恩四五個月大時出街都喊到拆天，所以都唔想叫太多人，到步雨恩適應觀察左一段時間，開始會同人玩又肯比咁多陌生人抱，實在進步左好多！
上帝早已預備，沒有任何人的計劃比衪的精妙體貼！
另一日，遠征去探公公都好乖，去程搭西鐵有啲麻煩，但細佬主動幫我地開路搵lift，下午推雨恩出街散步又幫手搵邊度有野啱雨恩玩算體貼，似乎佢終於接受左作為舅父仔既身份了。
尋回生活樂趣
生活多左唔同既活動，趣事都多左，
eg 1. 雨恩第一次玩滑梯根本唔知係咩黎，成個人硬左呔好似係行李帶上移動一樣。
eg 2. 有日沖涼我問BB”你做BB就黎做左9個月，有咩感受呀？”佢斜眼望住我，然後”哼”冷笑了一下，之後我自己係度笑…
eg 3. 去完酒店發現漏左隻老虎公仔係床度，打番去酒店問。服務員：隻老虎公仔係咩色？老公：咪老虎咁既色…我係電話旁邊笑到癲左(實際上笑左幾日) 老公都聽得出對方忍笑，但好專業咁繼續備案。
疫情下之前既生活實在太緊張也太死板，個人身心靈都終於可以放鬆啲，無聊既事開懷笑餐飽。
天氣開始轉涼，整理換季衫發現雨恩得兩件分別係適合一歲&兩歲既外套，終於有藉口可以買衫仔喇~朋友比左好多所以一直都忍手，拿著手機尋寶，成為另類樂趣。
他必像樹栽於水旁，在河邊扎根，炎熱來到，並不懼怕，葉子仍必青翠，在乾旱之年毫無掛慮，而且結果不止。耶 17:8
