開始加固

開始嘗試比啲水果蓉,蛋黃糊,豆腐等比雨恩食,雨恩咩都肯放入口食,但我地發現佢食過兩次蛋黃糊都有嘔奶情況出現,就暫時唔餵呢樣,多得媽咪細心留意到。

疫情進入第三波

踏入七月份,天氣熱得很,下午兩次泵奶開住風扇都出曬汗,要 keep住飲番好多水。亦因為天氣好,打算多啲帶雨恩落街曬太陽,誰知疫情突然來個第三波爆發,確診人數爆升,疫區籠罩東九龍,限聚令再一次收緊,又要乖乖留在家了。

媽媽累了,轉半母乳可以嗎?

這個月開始雨恩飲多左奶,但我泵出來的奶卻不多,泵奶次數經已由3-4次增至5次,只僅僅平到雨恩飲奶量,之前儲落既奶都用盡。心情好差,餵人奶好辛苦,好想放棄,朋友鼓勵”相信你做得到既!”為我帶來堅持的動力。跟老公商量後,計劃轉其中一餐做奶粉,我就可以將啲人奶儲番做備用冰奶,心理上亦無咁大壓力。第一次試將夜晚嗰餐轉奶粉,雨恩竟然一啖都唔肯飲,喊得好厲害,以為奶咀頭問題,原來係飲慣左人奶,奶粉唔啱口味…….唯有第二日再試。之後嗰日下午親雨恩唔太肚餓時比佢試2安,成功飲曬喎,食住個勢沖多啲,玩玩氹氹咁再飲共飲4安。翌日如是,同雨恩又玩下氹下,係有扭計但最後都飲左4.5安,令我感覺良好~入直路了嗎?

米糊救星

誰知到第四日,竟然扭得好厲害只飲到2安,睇住佢喊得咁慘又驚佢餓親,心都痛埋,即刻向相熟媽媽求救,聽完佢地意見,提醒五個月可以開始食米糊,個心定番曬~即買黎試下,好在雨恩肯食!

星星之火

同日辛苦在網上找到的泵奶器配件收到了,即晚泵奶既量多左,難道呢排奶量減少跟這小小的配件損壞有關?結果泵左幾日奶量都多番,證明呢個配件仔影響甚深遠!之後連續三星期半夜起身泵埋奶,儲番近廿包冰奶就減番日泵四次。同朋友傾開計,有餵全母乳媽媽同我分享,到有一日BB戒奶時就會好傷心,因為感覺BB唔再需要自己了。原來係會有呢啲感受。不過呢一刻既我暫時無呢種諗法,反而想雨恩快啲大個戒奶呢。

BB技能解鎖:

連續翻身
漸漸坐起來
食米糊
牙痕流好多口水
每天晚飯時間喊住要飲橙汁

上帝總在我地有需要之前,係身邊放下好多小天使,助我們度過困難,衪留下工作的痕跡提醒我們,神一直都在!

一點共鳴

電視播<<寶寶大過天>> 其中講到當全職媽媽的痛苦和掙扎,真係有好多共鳴!老公忙工作,夜夜先返屋企,老馮有關寶寶既事我都要處理,參與其中一兩樣護理,就說”我幫你同BB換左片喇”,聽完即刻好炆,點解係”幫我…” 照顧寶寶你無份家咩?; 平日準備出門,除非我開聲命令,否則老公完全唔會主動幫手整理寶寶出門物資,只顧睇住手機;周六日,就話係自己既休息日,但寶寶出世以來,我卻沒有法定休息日,公平嗎?

我好委屈

遇著心情不佳時,我更覺委屈,犠牲左自己既興趣專業、犠牲左升職既機會去湊B、為左減少開支,堅持餵人奶、唔要陪月、唔租屋、唔請工人…搞到自己咁辛苦係咪好戇居?回個神來,所有野都係自己揀既…原來育兒資訊話寶寶出世後對新生父母婚姻生活帶來衝擊,是真的。以上所有控訴,係生BB前沒有的,結婚後二人仍有好大空間去做自己各自喜歡的事,但寶寶出世後,要二人同心合力去照顧寶寶,大家理念想法若不是在同一條線上,就會發生衝突。之前聽過其他媽媽訴苦,但我當時完全不理解,無法為她們說些什麼來安慰。現在,終於明白了!

因為他日日憂慮,他的勞苦成為愁煩,連夜間心也不安。這也是虛空。傳 2:23

既然都是虛空,就不要浪費時間終日愁煩,找同行者傾訴,積極面對!