心理質素
每日過著廿四小時on call生活時,令兩個月時間覺得好似過左四個月咁耐…原來湊BB都好需要高既心理質素,呢頭餵完BB安撫左佢去瞓,就去洗奶樽啦,嗰頭又聽到BB喊聲衝入房睇佢咩事…係開初大家都未適應時容易精神緊張,尤其係如果老公不在家,得我一人獨自照顧BB時,整日都會心慌,後來慢慢學識放鬆下來,BB哭鬧有時只係扎醒發夢咁,未必真係有實質需要,只要確保佢身處環境安全,做埋手頭上啲野,由佢扭一陣都ok,自己既精神同情緒唔洗因為BB太大被影響到,記得我係照顧者,自己要冷靜先能夠好好照顧BB~
有幾日媽咪病左,我湊雨恩之餘要做埋全屋家務,晾衫之際雨恩喊到七彩,飲左奶又換埋片咁應該係扭抱啦,無理到繼續做埋啲野先,返到入房時佢經已瞓著埋添。
我的技能解鎖:
- 確定換左片又餵左奶既情況下,可以無視BB既喊聲,平靜地做家務。
- 雨恩出世頭半月,照顧佢幾乎用曬我全日既時間,兩星期後,趁餵奶泵奶時間稍稍拉長了,就用空檔時間去做埋家務,間唔中打下日記,找一些自己的興趣去做,為自己營造Me Time。
- 以前食一餐飯最少半個至一個鐘,而家十分鐘食完執埋枱喇~
- 一隻手泵奶另一隻手拍BB背脊安撫佢瞓覺。
- 喺自己未瞓醒,眼都未開得曬既情況下幫雨恩換片。
天天都在學習,沒有人告訴我對錯,不停在錯誤中找解決方法,正面啲睇係一種樂趣黎既~
BB技能解鎖:
- 飲到5安奶&晚上最後一餐奶之後可以連續睡上6-8小時
- 哄玩時會笑,眼睛會追蹤人物或聲音來源
- 頸項開始有少少力,但未好穩定
- 抱起佢企時,雙腳會嘗試撐起
- 識bu口水,玩口水波
- 啜手指,雙手彼此玩弄
- 呆望鏡中的自己
高速長大
一路湊雨恩都有幫佢影下相,到放鬆落黎既時候睇番,雨恩輪廓樣子較出世時不一樣,抱起手都無咁柔弱,睇住佢既成長同改變,仍然覺得好不可思議,好似剛發現懷孕不久,咁就生左咁大個BB女出黎,雨恩不知不覺地長大了很多。雖然湊既過程好攰,但諗到呢個時期BB會大得好快,同懷孕每月既變化一樣,每個成長階段好快會過,而且過左無得返轉頭,珍惜可以比佢扭計既時間,好好記住同感受可以手抱佢既感覺!睇番雨恩出世時既相,非常驚嘆過去兩個月是怎樣捱過的?!神都一一帶領我們走過。另外,原本要帶BB去醫院骨科檢查寬關節,再到健康院檢查後,確認一切正常不用複檢了。
謝謝你們的愛
呢段疫情期間好多人關心問候我地同雨恩既狀況,送上防疫物資,親戚們幫忙補給BB用品,又繼續收到好多禮物。雖然無點出街見過人,但感覺同身邊既人依然好近,關係也彼此連繫著,打個電話定必隨傳隨到。
窗外的世界
天天也為疫情禱告,盼望整個世界的人都可回復正常生活,即或不然,我都相信神在這裡一直掌管。
